Milano-Kortina Qış Olimpiya Oyunlarında qadınlar arasında 1500 metr məsafəyə şort-trek (sürətli konkisürmə) yarışlarının dörddəbir final mərhələsi dramatik hadisə ilə yadda qalıb. Polşalı idmançı Kamila Selle buz üzərində yıxılaraq rəqibinin konkisinin bıçağının üzünə dəyməsi nəticəsində ciddi xəsarət alıb. Gənc idmançının gözünün bir neçə santimetr fərqlə möcüzəvi şəkildə xilas olduğu bildirilir.
Gərgin mübarizə şəraitində keçən dörddəbir finalda polşalı konkisürən Selle döngəni dönərkən müvazinətini itirib və rəqibi ilə toqquşub. Bu zaman amerikalı idmançı Kristen Santos-Qrisvoldun konkisinin iti bıçağı polşalının üzünə dəyərək dərin kəsik yaradıb.
Hadisə yerinə dərhal tibbi briqada cəlb olunub. Buzun üzərində yardım gözləyən Sellenin ətrafı, digər idmançıların və tamaşaçıların görməməsi üçün ağ örtüklə əhatəyə alınıb. Qaşının üzərinə ilkin tikişlər qoyulan təcrübəli idmançı, “Milan Arena”dan xərəklə çıxarılaraq xəstəxanaya aparılıb.
Rəsmi qurumların verdiyi məlumata görə, Sellenin gözündə hər hansı ciddi zədə aşkar edilməyib və üzündəki dərin kəsiyə görə xəstəxanada geniş müayinə aparılır. İdmançının ümumi vəziyyəti stabil olsa da, müşahidə altında saxlanılır.
Bu cür hadisələr şort-trek idmanının nə dərəcədə təhlükəli və yüksək konsentrasiya tələb etdiyini bir daha sübut edir.