Şahmat üzrə ölkə çempionatı başa çatmaq üzrədir. Bu gün yarımfinal mərhələsinin cavab oyunları keçirilib və həm kişilərin, həm də qadınların yarışında həlledici məqamlar yaşanıb.

Kişilərin mübarizəsində turnirin reytinq-favoriti Şəhriyar Məmmədyarov yenidən Aydın Süleymanlı ilə heç-heçə edib. Beləliklə, bu cütlükdə qalib sabah keçiriləcək tay-brek mərhələsində müəyyənləşəcək. Digər cütlükdə isə Məhəmməd Muradlı rəqibi Read Səmədovu məğlub edərək adını finala yazdırıb.

Qadınlar yarışında isə artıq finalçılar bəllidir. Ülviyyə Fətəliyeva Gülnar Məmmədova ilə heç-heçə oynayıb. İlk görüşdə qazandığı qələbə sayəsində o, final vəsiqəsini təmin edib. Ayan Allahverdiyeva isə Türkan Məmmədyarovanı məğlub edərək finala yüksəlib (ilk görüşdə heç-heçə qeydə alınmışdı). Beləliklə, Fətəliyeva və Allahverdiyeva çempionluq uğrunda mübarizə aparacaqlar. Məmmədova və Məmmədyarova isə 3-cü yer uğrunda görüşdə qarşılaşacaqlar. Xatırladaq ki, ümumi mükafat fondu 92 000 manat olan ölkə çempionatı fevralın 22-də başa çatacaq.