Ukrayna futbolunda Sergey Rebrov erası başa çatmaq üzrədir. Komandanın DÇ-2026-dan kənarda qalması 51 yaşlı mütəxəssisin gələcəyini ciddi sual altına salıb. Müqavilə müddətinin bitməsinə az qalmış ekspertlər artıq yeni namizədləri müzakirə edirlər.

“Sport.ua” portalına danışan sabiq FİFA referisi Miroslav Stupar Rebrovun texniki zonadakı həddindən artıq soyuqqanlılığını onun ən böyük mənfi cəhəti kimi qiymətləndirib.

Ekspertin fikrincə, bu, futbolçuların oyununa da mənfi təsir göstərir: “Mən hesab edirəm ki, millinin sükanı arxasına bizim reallıqlara bələd olan, futbolçuların mentalitetini bilən yerli mütəxəssis keçməlidir. Bu şəxs xarizmatik, güclü motivator və oyunçular arasında böyük nüfuza sahib biri olmalıdır. Təəssüf ki, Sergey Rebrov oyun zamanı emosiyasızdır və bu, komandaya fayda vermir. Bəlkə də elə buna görə futbolçular meydanda monoton, enerjisiz və çox vaxt iradəsiz görünürlər”.

Stupar qeyd edir ki, hazırda Ukrayna futboluna Vitali Kvartsyani tipində, sərt və tələbkar məşqçi lazımdır. Lakin Kvartsyani artıq uzun müddətdir təcrübədə deyil. Bu məqamda ekspertin diqqət çəkdiyi əsas ad hazırda Azərbaycan Premyer Liqasında çalışan mütəxəssisdir: “Yerli klublarda çalışan məşqçilər arasında lazımi keyfiyyətlərə malik namizəd tapmaq çətindir. Məhz buna görə də Yuri Vernidubun dəvət olunması ağlabatandır. Onun rəhbərlik etdiyi komandalar döyüşkən xarakterlərinə görə həmişə seçiliblər. Düzdür, Vernidub hazırda Azərbaycanda çalışır, amma inanıram ki, o, milli komandaya rəhbərlik etmək təklifindən imtina etməz. Çünki bu, hər bir məşqçinin arzusudur”.

Xatırladaq ki, Yuri Vernidub hazırda “Neftçi”nin baş məşqçisidir. Onun Ukrayna millisinə mümkün keçidi həm Ukrayna, həm də Azərbaycan idman mediasında geniş rezonans doğura bilər.