Braziliyanın “Kruzeyro” və “Atletiko Mineyro” komandaları arasında keçirilən Mineyro çempionatının final matçı futbol tarixinə keçəcək kütləvi dava ilə yadda qalıb. Görüşün baş hakimi Matus Kandanşan oyunsonu hesabatında hadisələrin miqyasına görə rekord sayda — 23 futbolçuya qırmızı vərəqə göstərildiyini rəsmən təsdiqləyib.

Hakimin rəsmi hesabatına əsasən, gərginlik “Kruzeyro”nun oyunçusu Kristian ilə “Atletiko Mineyro”nun qapıçısı Everson arasındakı insidentlə alovlanıb. Hesabatda qeyd olunur ki, Kristian top qapıçının nəzarətində olduğu halda, rəqibin baş nahiyəsinə həddindən artıq güc tətbiq edərək zərbə endirib. Everson bu kobudluğa dərhal sərt reaksiya verərək, rəqibinin üzünə dizi ilə zərbə vurub. Bu qarşılıqlı aqressiyadan sonra hər iki komandanın oyunçuları və texniki heyəti sahəyə daxil olub, nəticədə idarəolunmaz kütləvi dava başlayıb.

Baş hakim Matus Kandanşan qeyd edib ki, sahədəki gərginlik və fiziki qarşıdurma o qədər şiddətli olub ki, vərəqələri həmin an nümayiş etdirmək təhlükəsizlik baxımından qeyri-mümkün idi. Bu səbəbdən, hadisələrdə iştirak edən futbolçular video-görüntülər əsasında tək-tək müəyyən edilərək oyunsonu protokola daxil edilib və meydandan kənarlaşdırılıblar.

“Digər futbolçular kütləvi dava zamanı rəqiblərinə ardıcıl yumruq və təpik zərbələri endirdikləri üçün birbaşa qırmızı vərəqə ilə cəzalandırılıblar.” — Hakim hesabatından.

Gərgin finalın yekununda referi “Kruzeyro” 12-i, “Atletiko Mineyro”nun isə 11 futbolçusna göstərib. Cəmi 23 futbolçunun meydandan qovulması ilə nəticələnən bu hadisə ilə bağlı Braziliya Futbol Konfederasiyasının daha ağır intizam tədbirləri görəcəyi gözlənilir.