Lionel Messi və Tomas Müller yenidən rəqib kimi, bu dəfə MLS kuboku finalında qarşılaşacaqlar. Daha dəqiq desək, dekabrın 6-da gecə saatlarında Lionel Messinin “İnter Mayami”si ilə Tomas Müllerin “Vankuver Uaytkeps”nin görüşündə bu iki əfsanəvi futbolçunun fərdi rəqabətində yeni bir səhifə yazılacaq.
Noyabrın 29-da “İnter Mayami” “Nyu York Citi”ni 5:1 hesablıyla məğlub edərək Şərq Konfransının qalibi kimi finala vəsiqə qazandı. Həmin axşam “Vankuver” Qərb konfransının finalında “San Dieqo”nu yenərək (3:1) Messinin Müllerlə daha bir qarşılaşması üçün zəmin yaratdı.
Messi ilə Müller klub və beynəlxalq yarışlarda 10 dəfə qarşılaşıblar. Üstünlük alman futbolçunun tərəfindədir. Müller Messi ilə duelin yeddisində qələbə qazanıb, argentinalı ulduz isə cəmi üç dəfə duelin qalibi olub. Klub səviyyəsində onların bütün görüşləri Çempionlar Liqasına təsadüf edir. Müller yalnız “Bavariya”da, Messi isə “Barselona” və PSJ-də oynayıb. Müller altı oyunun beşində qələbə qazanıb, o cümlədən Messinin karyerasının ən ağır məğlubiyyəti, almanların isə “Barsa” üzərində tarixi qələbəsi olub (8:2). Argentinalının klubdakı yeganə qələbəsi ÇL-2014/15 mövsümünün yarımfinalında (3:0) baş tutub, ardından “Barselona” finalda “Yuventus”u 3:1 hesabıyla məğlub edərək qitənin ən güclü klubu adını qazanıb. Yığma səviyyəsində isə hər ikisinin hesabında iki qələbə var. Ancaq bu qələbələrin dəyəri tam fərqlidir: Müller DÇ-2010-nun 1/4 finalı və DÇ-2014-ün finalında sevinib, Messinin uğurları isə yalnız yoldaşlıq oyunlarında olub.
Beləliklə, alman futbolçu Messi ilə son dörd duelin hamısından qalib ayrılıb. Amerika qitəsində isə yolları ilk dəfə kəsişəcək. Messinin “Vankuver”ə qarşı son nəticələri də uğurlu olmayıb. Komandası KONKAKAF Çempionlar Kubokunun yarımfinalında hər iki oyunda “Uaytkeps”ə uduzub. Beləliklə, şənbə günü “İnter Mayami”nin kapitanı karyerasının ən çətin rəqiblərindən birinə qarşı oyunda vəziyyəti dəyişməyə çalışacaq.
Turnir Mərhələ Nəticə
Yoldaşlıq oyunu Almaniya – Argentina 0:1
DÇ-2010 1/4 final Argentina – Almaniya 0:4
Yoldaşlıq oyunu Almaniya – Argentina 1:3
ÇL-2012/13 1/2 final Bavariya – Barselona 4:0
DÇ-2014 final Almaniya – Argentina 1:0
ÇL-2014/15 1/2 final Barselona – Bavariya 3:0
ÇL-2014/15 1/2 final Bavariya – Barselona 3:2
ÇL-2019/20 1/4 final Barselona – Bavariya 2:8
ÇL-2022/23 1/8 final PSJ – Bavariya 0:1
ÇL-2022/23 1/8 final Bavariya – PSJ 2:0
Yekun: Müller 7, Messi 3 qələbə