Avropanın ən böyük futbol səhnəsində amansız mübarizə davam edir! Çempionlar Liqasının 1/8 finalı bu gecə azarkeşlərə əsl futbol şousu vəd edir. Qitə nəhəngləri 1/4 final biletini qoparmaq üçün ilk addımlarını atacaq. Gecənin, bəlkə də mərhələnin ən çox gözlənilən toqquşması isə Madriddə yaşanacaq: “Santyaqo Bernabeu”da “Real” və “Mançester Siti”nin super dueli milyonları ekran başına toplayacaq!
“Real” – “Mançester Siti”
Arbeloanın inamı: “Real”ın baş məşqçisi Arbeloa rəqibin gücünü etiraf etsə də, komandasına güvənir: “Siti 7-8 ildir Qvardiola ilə işləyir, onlar gözübağlı oynaya bilirlər. Amma biz ‘Real’ıq və heç vaxt özümüzü kimdənsə zəif hiss etmirik. Biz həmişə favoritik”.
Mbappe şoku: “Olimpiakos”la matçda ÇL tarixinin ən sürətli 2-ci het-trikini (6 dəqiqə 42 saniyəyə) edən Kilian Mbappe zədə səbəbindən bu gün oynamayacaq. Qvardiola fransız ulduzun müalicə üçün Parisə yollanmasına özünəməxsus tərzdə reaksiya verib: “Mənim fikrim bu qədər önəmlidir? Klubumuzda da belə şeylər olur”.
Donnarumma və Kurtua: “Şəhərlilərin”nin qapıçısı Canluici Donnarumma “Real”ı təəccübləndirmək istədiklərini bildirib və həmkarı Tibo Kurtua haqqında xoş sözlər deyib: “O, dünyanın ən yaxşılarındandır. Ümid edirəm ki, bu gün onun qapısına çox zərbə endirəcəyik və o, qol vurmağımıza imkan verəcək”.
Holand faktoru: Norveçli qol maşını İspaniya klublarının əsl kabusuna çevrilib. O, Çempionlar Liqasında Pireney təmsilçilərnin qapısına 10 qol vurub!
PSJ” – “Çelsi”
“Çelsi”nin gənclik inqilabı: Londonlular ümumi mərhələdə “Ayaks”ı 5:1 darmadağın edərək tarix yazıblar. “Zadəganlar” ÇL tarixində eyni matçda 3 gənc futbolçusu – Mark Qiu (19), Estevao (18) və Tayrik Corcun (19) qol vurduğu ilk komanda olub.
PSJ-nin qırılan seriyası: Paris təmsilçisi ümumi mərhələdə “Atletik”lə qolsuz heç-heçə etməklə ÇL-in qrup/ümumi mərhələlərindəki 104 oyunluq qol seriyasının (0:0 oynamamaq) sonuna gəlib.
Bude Qlimt” – “Sportinq”
Norveç nağılı: “Bude Qlimt” pley-off mərhələsində ötən mövsümün finalçısı “İnter”i hər iki matçda (3:1, 2:1) məğlub edərək bu mərhələni adlayan ilk Norveç klubu olub.
Açıq futbol: “Sportinq” cari mövsüm ÇL-dəki 8 matçın hamısında qol vursa da, 7-də qapısında qol görüb. Lissabonlular Avrokuboklardakı son 13 matçından yalnız ikisində uduzublar (8 qələbə, 3 heç-heçə).
Bayer” – “Arsenal”
“Bayer”in müdafiə səddi: Leverkuzen təmsilçisi ÇL-də 50-ci qələbəsini məhz İngiltərə klubu “Mançester Siti”ni (2:0) məğlub etməklə qazanıb və turnirdəki son 3 matçında qapısını toxunulmaz saxlayıb.
“Arsenal”ın İspaniya sindromunu qırması: “Topçular” ÇL-də İspaniya klublarına (“Atletiko”ya 4:0, “Atletik”ə 2:0 və s.) ardıcıl 7 matçda qalib gələn ilk komanda kimi tarixə düşüb.
Maraqlı fakt: Kepa əfsanəsi davam edəcəkmi?
Futbol dünyasında təsadüflər bəzən qanunauyğunluğa çevrilir:
2020/21 mövsümü: Kepa “Çelsi”də ehtiyat qapıçı olur – “Çelsi” Çempionlar Liqasını qazanır.
2023/24 mövsümü: Kepa “Real”da ikinci qapıçı olur – “Real” Çempionlar Liqasını qazanır.
2025/26 mövsümü: Kepa hazırda “Arsenal”ın ehtiyat qapıçısıdır – “Arsenal”… Növbəti çempiondurmu?
Çempionlar Liqası, 1/8 final (ilk oyunlar)
21:45 Bayer – Arsenal İctimai TV
00:00 PSJ – Çelsi CBC Sport
00:00 Real – Mançester S İctimai TV
00:00 Bude Qlimt – Sportinq