Avropa futbolunun elitası — Çempionlar Liqasında pley-off mərhələsinin həyəcanı başlayır. Azərbaycanın son illərdəki dəyişməz çempionu “Qarabağ”, İngiltərə Premyer Liqasının iddialı təmsilçisi “Nyukasl”ı Bakıda qəbul edir. Hər iki klub üçün bu matç tarixi əhəmiyyət kəsb edir, çünki həm “Köhlən atlar”, həm də “Sağsağanlar” turnirin bu mərhələsində ilk dəfə debüt edirlər.
Qurban Qurbanovun “sabit” heyəti və Bakı qalası
“Qarabağ” qrup mərhələsini 10 xalla tamamlayaraq Avropanın ən güclü 24 komandası sırasına daxil olub. Komanda son matçda “Liverpul”dan sarsıdıcı məğlubiyyət (0:6) alsa da, doğma meydanda “Kopenhagen” və “Ayntraxt” kimi komandaları diz çökdürməyi bacarıb.
Qurban Qurbanov üçün əsas üstünlük heyətin bütövlüyüdür. Ehtiyat qapıçı Şahruddin Məhəmmədəliyev istisna olmaqla, komandada ciddi itki yoxdur. Xüsusilə Mateuş Koxalski, Bəhlul Mustafazadə, Kevin Medina və Abdellah Zubir kimi oyunçuların start heyətindəki yeri toxunulmaz görünür. Hücum xəttində isə son ev oyunlarında fərqlənən Kamillo Duran “Nyukasl” müdafiəsi üçün əsas təhdid olacaq.
“Nyukasl”ın tarixi şansı və Eddi Haun rekordu
“Nyukasl” 1998, 2003 və 2023-cü illərdə qrup mərhələsində mübarizəni dayandırsa da, bu mövsüm tilsimi qırmağı bacarıb. Eddi Haun rəhbərliyi altında 14 xal toplayan komanda, 1/8 finalın bir addımlığındadır. İngilislər Bakıya gəlməmişdən əvvəl daxili arenada “Tottenhem” (2:1) və “Aston Villa” (3:1) üzərində inamlı qələbələr qazanaraq əla formaya malik olduqlarını sübut ediblər. Əgər Hau Bakıdan qələbə ilə dönsə, o, bir Çempionlar Liqası mövsümündə ən çox qələbə qazanan ingilis məşqçi (5 qələbə) kimi Bobbi Robson və Qrem Potterin rekorduna şərik olacaq.
Zədə böhranı: “Sağsağanlar“ın qanadı qırılıb?
“Nyukasl” Bakıya gələrkən ciddi kadr problemləri ilə üzləşib. Siyahı kifayət qədər uzundur:
Bruno Gimaraeş: Kapitanın iki aylıq yoxluğu orta sahədə böyük boşluq yaradır.
Sven Botman və Fabian Şer: Müdafiənin mərkəzi demək olar ki, yenidən qurulmalıdır.
Lyuıs Mayli və Tino Livramento: Yanvar ayından bəri komandaya kömək edə bilmirlər.
Buna baxmayaraq, Joelintonun məşqlərə qayıtması və Entoni Qordonun fantastik forması (ÇL-də 6 qol) ingilislərin əsas ümid yeridir.
Statistika nə deyir?
Rəqəmlər “Qarabağ”ın İngiltərə klubları ilə oyunlarda çətinlik çəkdiyini göstərir (9 oyunda 8 məğlubiyyət). Lakin təmsilçimizin son 11 Avropa oyununun 8-də 2 və daha çox qol vurması hücum potensialının yüksək olmasından xəbər verir. Digər tərəfdən, “Nyukasl”ın yanvar ayından bəri qapısını toxunulmaz saxlaya bilməməsi (ardıcıl 7 matçda qol buraxıblar) “Köhlən atlar” üçün əlavə şans yaradır.
Yekun proqnoz: Gərgin heç-heçə?
Ekspertlər “Nyukasl”ın kağız üzərində favorit olduğunu desələr də, Bakıdakı atmosfer və rəqibin zədə problemləri “Qarabağ”a tarixi nəticə qazanmaq üçün qapı açır. Çox güman ki, hər iki komandanın qol vuracağı gərgin mübarizə izləyəcəyik.