Ötən həftə “Mançester Siti” üzərində qələbə qazanan “Mançester Yunayted”, yüksəlişini davam etdirir. Premyer Liqanın 23-cü turu çərçivəsində keçirilən səfər qarşılaşmasında “qırmızı şeytanlar” Londonun “Arsenal” klubunu 3:2 hesabı ilə məğlub edib. Maykl Karrikin rəhbərliyi altında inamlı oyun nümayiş etdirən Mançester təmsilçisi, bu çətin sınaqdan da 3 xalla ayrılmağı bacarıb.

“Emireyts” stadionunda baş tutan matçda hesab 29-cu dəqiqədə açılıb — Lisandro Martinesin öz qapısına vurduğu qol meydan sahiblərini önə keçirib. Lakin qonaqlar ruhdan düşməyərək təzyiqi artırıb və 37-ci dəqiqədə Brayan Mbeumonun qolu ilə tarazlığı bərpa ediblər (1:1).

İkinci hissəyə daha sürətli başlayan “Yunayted”, 50-ci dəqiqədə Patrik Dorqunun dəqiq zərbəsi ilə hesabda önə keçib. Oyunun son dəqiqələri isə əsl dram janrında keçib. 84-cü dəqiqədə Mikel Merino “topçular”ın bərabərlik qoluna imza atsa da, London azarkeşlərinin sevinci cəmi 3 dəqiqə sürüb. 87-ci dəqiqədə Mateus Kunya son nöqtəni qoyaraq “Mançester Yunayted”ə möhtəşəm qələbə qazandırıb.

Maykl Karrikin gəlişindən sonra ardıcıl iki böyük qələbə qazanan “Yunayted”, məğlubiyyətsizlik seriyasını 6 oyuna çatdırıb. Hazırda 38 xalla 4-cü pillədə qərarlaşan Mançester təmsilçisi Çempionlar Liqası iddiasını gücləndirib. 7 oyundan sonra ilk məğlubiyyətini alan “Arsenal” isə 50 xalla hələ də turnir cədvəlinə başçılıq edir.