Misli Premyer Liqasının 21-ci turu çərçivəsində keçirilən “İmişli” – “Şamaxı” (0:0) qarşılaşmasından sonra meydan sahiblərinin baş məşqçisi Jorje Kaşkilya oyun barədə fikirlərini bölüşüb. Portuqaliyalı mütəxəssis komandasının qələbəyə layiq olduğunu, lakin bəxtsizliklə üzləşdiklərini bildirib.

Oyunun çətin keçəcəyini əvvəlcədən təxmin etdiklərini deyən Kaşkilya, rəqibin oyun üslubuna da toxunub: “Gözlədiyimiz kimi, çətin oyun keçdi. Bildiyiniz kimi, “Şamaxı” daha çox uzun ötürmələrə əsaslanan güclü futbol oynayır. Meydanda qayda pozuntuları çox idi və bu da oyunun tempinin aşağı düşməsinə səbəb olurdu”.

Baş məşqçi komandasının üstün tərəf olduğunu vurğulayaraq, itirilən iki xala görə təəssüfünü gizlətməyib: “Hesab edirəm ki, bu gün meydandan qalib ayrılan tərəf məhz “İmişli” olmalı idi. Biz iki xal itirdik. Oyun ərzində top iki dəfə qapı dirəyinə dəydi. Qol vurmağa çox yaxın olsaq da, bəxtimiz gətirmədi. Qarşılaşmanın son dəqiqələrində də fərqlənməyə çalışdıq, lakin alınmadı. Nəticədə istədiyimiz qələbəni qazana bilmədik”.

Komanda oyun planında canlanma göstərsə də, Kaşkilyanın qeyd etdiyi “bitiricilik” problemi turnir cədvəlindəki mövqeyə mənfi təsir etməkdə davam edir.