FİFA İnfantinonun son bəyanatlarından sonra Rusiya millisi və klubları ilə bağlı yekun mövqeyini müəyyənləşdirib. Qurumun prezidentinin kəskin çağırışına baxmayaraq, Rusiya futbolunun beynəlxalq arenaya qayıtması məsələsi dəstək qazanmayıb.

“The Times” nəşrinin məlumatına görə, FİFA Şurası Rusiya komandalarının turnirlərə qayıdışı variantını yaxın gələcəkdə müzakirəyə çıxarmağı planlaşdırmır. Qurum rəhbərliyi bu həssas məsələni rəsmi gündəliyə gətirmək fikirində vaz keçiblər.

Xatırladaq ki, FİFA prezidenti Canni İnfantino bir müddət əvvəl verdiyi açıqlamada sanksiyaların səmərəsiz olduğunu vurğulamışdı: “Qadağa gözlənilən nəticəni vermədi – əksinə, o, sadəcə məyusluğu artırdı və nifrət hissini körüklədi”.

İnfantinonun bu “yumşalma” siqnalına baxmayaraq, FIFA daxilindəki əsas güclər, xüsusilə bir çox Avropa ölkələrinin futbol federasiyaları buna kəskin etiraz ediblər. Belə bir addımın genişmiqyaslı boykotlara və diplomatik gərginliyə səbəb ola biləcəyindən ehtiyat edən FİFA Şurası, məsələni səsverməyə çıxarmamaq qərarına gəlib.