Bu gün, “The Best” mükafatlandırma mərasimi keçiriləcək və tədbirdə FİFA ilin yekunlarına görə dünya futbolunun ən yaxşılarını müəyyən edəcək.

İlin ən yaxşı oyunçusu adına 11 futbolçu iddialıdır. Ən çox təmsilçisi olan klublar PSJ və “Barselona”dır. Namizədlər siyahısına PSJ-dən Usman Dembele, Əşrəf Hakimi, Nunu Mendeş və Vitinya, eləcə də “Barselona”dan Pedri, Rafinya və Lamin Yamal daxil edilib. Bundan əlavə, mükafat uğrunda “Bavariya”dan Harri Keyn, “Real”dan Kilian Mbappe, “Çelsi”dən Koul Palmer və “Liverpul”dan Məhəmməd Salah mübarizə aparacaq.
Xatırladaq ki, ötən il bu nominasiyanın qalibi “Real”ın hücumçusu Vinisius Junior olmuşdu.
Həmçinin FİFA ilin ən yaxşı məşqçisi adına namizədlərin siyahısını da açıqlayıb. Siyahıya “Arsenal”dan Mikel Arteta, PSJ-dən Luis Enrike, “Barselona”dan Hans-Diter Flik, “Çelsi”dən Enso Mareska, “Liverpul”dan Arne Slot, Meksika millisindən Xavyer Aqirre və Portuqaliya millisindən Roberto Martines daxil olub.
Əsas fərdi mükafatlardan əlavə, qala-gecədə  ilin ən yaxşı qadın futbolçusu, kişilər və qadınlar arasında ən yaxşı qapıçılar, qadın futbolunda ən yaxşı məşqçi müəyyənləşəcək, həmçinin Puşkaş və Marta mükafatları təqdim olunacaq.