Futbol üzrə ölkə çempionatının 2-ci Liqasında çıxış edən «Şəki Siti»nin 13-cü turda «Qaradağ Lökbatan»la oyuna çıxmamasının səbəbi məlum olub. Komandanın bu addımı atmasına futbolçuların mövsümün əvvəlindən bəri maaşlarını ala bilməməsi səbəb göstərilir. Klub rəhbərliyinə ultimatum təqdim edən oyunçular, yaranmış borcların bir hissəsi ödənilənə qədər matçlara çıxmayacaqlarını qəti şəkildə bildiriblər. Hazırda 10 xalla turnir cədvəlinin 11-ci pilləsində qərarlaşan «Şəki Siti»iyə cəza tətbiqi istisna olunmur. İntizam qaydalarına əsasən, komandaya texniki məğlubiyyət (0:3) veriləcəyi və klubun böyük məbləğdə cərimələnəcəyi gözlənilir.