ABŞ, Meksika və Kanadanın ev sahibliyi edəcəyi dünya çempionatının başlamasına cəmi iki ay qalmış FİFA-dan futbolsevərləri şoka salan addım gəlib. Qurum gözlənilmədən ən yaxşı yerlər üçün bilet qiymətlərini kəskin şəkildə artırıb. İndi tribunaların ən prestijli bölmələrində əyləşmək istəyənlər astronomik məbləğlərdən keçməli olacaqlar.
Xüsusilə ABŞ – Paraqvay qarşılaşması üçün rəsmi bilet qiymətlərindəki artım diqqət çəkir. Əvvəllər bu oyun üçün ən bahalı bilet 2 735 dollar idisə, yeni tənzimləmədən sonra bu rəqəm 4 105 dollara yüksəlib.
Turnirin kulminasiya nöqtəsi olan final matçında da vəziyyət fərqli deyil. Əvvəlki “pik” qiymət olan 8 680 dollar artıq tarixə qovuşub; çempionluq mübarizəsini canlı izləmək istəyənlər indi düz 10 990 dollar ödəməli olacaqlar.
FİFA-nın bu qəfil qərarı azarkeşlər tərəfindən hiddətlə qarşılanıb. Dünyanın dörd bir yanından olan futbol həvəskarları federasiyanı “gözüaçıqlıqda” və tamahkarlıqda ittiham edirlər. İddialara görə, FİFA sadəcə qiymət artımı ilə kifayətlənməyib, həm də yerlərin kateqoriyalarını süni şəkildə dəyişib. Belə ki, əvvəllər daha aşağı qiymətə satılan standart yerlərin statusu artırılaraq “premium” kateqoriyaya daxil edilib.
Əvvəllər biletlər dörd əsas kateqoriya üzrə təsnif edilirdi: 1-ci kateqoriyaya stadionun alt yaruslarında yerləşən ən prestijli və bahalı yerlər, 4-cü kateqoriyaya isə tribunaların künc hissələrindəki ən münasib qiymətli yerlər daxil idi.
“The Athletic” nəşrinin məlumatına görə, FİFA-nın yeni tətbiq etdiyi kateqoriya sistemi dünya çempionatının ən azı 20 mühüm oyununu əhatə edəcək və bu, faktiki olaraq qiymətlərin gizli şəkildə qat-qat artırılması deməkdir.
Maraqlıdır ki, ali futbol qurumu bu kəskin artımla bağlı hər hansı rəsmi açıqlama verməyib və sadəcə qiymət dəyişikliyini tətbiq etməklə kifayətlənib. Xatırladaq ki, ötən ilin dekabrında FİFA azarkeşlər üçün 60 dollarlıq güzəştli bilet partiyasını satışa çıxarmış və həmin biletlər bir neçə dəqiqə ərzində tükənmişdi.Hazırda final matçı üçün satışda nə qədər biletin qaldığı barədə dəqiq məlumat yoxdur, lakin mövcud qiymətlər sıravi azarkeşlər üçün dünya çempionatını əlçatmaz bir xəyala çevirib.