Almaniyada hökm sürən kəskin şaxta və qarlı havaya baxmayaraq, “Kayzerslautern” bazar günü səhər saatlarında növbəti məşqinə çıxıb. Betzenberq stadionunun qarla örtülü meydanında baş tutan hazırlıq prosesi həm azarkeşlər, həm də klubun gələcək planları baxımından diqqətçəkən məqamlarla yadda qalıb.
Açıq məşqin başlanğıcında klub rəhbərliyi hər hansı yeni transfer təqdim etməsə də, əsas diqqət zədəsini sağaltmaqda olan futbolçulara yönəlib. Sevindirici haldır ki, noyabrın 8-dən bəri bağlayıcı vətərinin (sindesmoz bağı) qismən cırılması üzündən komandadan ayrı düşən millimizin hücumçusu Mahir Emreli yenidən yaşıl meydanda görünüb. O, hazırda fərdi məşqlərlə bərpa prosesinin növbəti mərhələsinə start verib.
Komandanın baş məşqçisi Torsten Liberkneht zədəli oyunçuların fiziki durumu ilə bağlı jurnalistlərə qısa açıqlama verib. O, Emreli və digər zədəli futbolçuların fərdi məşqlərə başlamasını müsbət qiymətləndirsə də, onların tam şəkildə komandaya qoşulma tarixi ilə bağlı ehtiyatlı danışıb:
“Onların fərdi məşqlərə qayıtması sevindiricidir, lakin tam formaya düşüb meydana çıxacaqları dəqiq vaxtı indidən proqnozlaşdırmaq çətindir. Tələsmək istəmirik, hər şey bərpa prosesinin gedişatından asılı olacaq.”
Hazırda “Kayzerslautern” azarkeşləri komandanın hücum xəttinin güclənməsi üçün həm Mahirin tam sağalmasını, həm də mümkün yeni transfer xəbərlərini gözləyirlər.