Boksçularımız Səudiyyə Ərəbistanının paytaxtı Ər-Riyadda VI İslam Həmrəyliyi Oyunlarında çıxışını başa vurub. Millimiz evə 1 qızıl, 3 gümüş və 2 bürünc medalla dönüb.
Yeganə qızıl medalı 80 kq cəki dərəcəsində yarışan Səidcəmşid Cəfərov qazanıb. Bu gün keçirilən finalda türkiyəli Sultan Osmanlı ilə döyüşən Cəfərov rəqibini 4:1 (28:29, 29:28, 30:27, 29:28, 30:27) hesabıyla məğlub edib.
Nərgiz Zeynalova (54 kq) və Aynur Mikayılova (57 kq) İslamiadada ikinci yeri tutublar. Finalda özbək Madiyar Daniyarovla döyüşməli olan Məhəmmədəli Qasımzadə (60 kq) zədə üzündən rinqə çıxa bilməyib və yarışı gümüş medalla başa vurub.
Boksçularımız VI İslam Həmrəyliyi Oyunlarında üst-üstə 6 medal qazanıblar. Xatırladım ki, bir gün öncə Fatimə Mehdiyeva (65 kq) və Sərxan Əliyev (70 kq) bürünc mükafata yiyələnib.
