Bu gün futbol üzrə Azərbaycan Kuboku start götürüb. Yeni kubok mövsümü I təsnifat mərhələsinin dörd oyunu ilə başlayıb. Bu mərhələdə ikinci liqa təmsilçiləri növbəti mərhələ uğrunda üz-üzə gəlib. Bu mərhələ Rövşən Şahmuradovun benefisi ilə yadda qalıb. “Qaradağ Lökbatan”ın hücumçusu “Ağdaş”ın qapısına dörd dəqiqəyə üç qol vurmaqla böyük ehtimalla Azərbaycan futbolunun ən sürətli het-trikini edib. Lökbatanlılar 76-cı dəqiqədən 9 nəfər qalan rəqibi darmadağın edib. Şəkili “ingilislər” gözlənilmədən çətin qələbə qazanıb. Komanda hesabda geri düşsə də son 3 dəqiqədə 2 qol vura bilib. İkinci dəstədə işləri yaxşı getməyən və 4 oyuna 4 məğlubiyyət alan “Ağstafa Gəncləri” ölkə kuboku yarışında azarkeşlərini sevindirib. Ağstafalılar minimal hesabla “Şirvan”a qalib gəlib.
“Dinamo” ilə oyunda “Kür-Araz”ın bəxti gətirməyib. İmişli komandası ilk yarının sonunda azlıqda qalsa da, ikinci hissənin əvvəlində daha bir qol vuraraq fərqi artırıb. Lakin “polislər”in təzyiqinə tab gətirə bilməyib və əsas vaxt 2:2 başa çatıb. “Dinamo” uzatmalarda daha bir qol vuraraq çətin qələbə rəsmiləşdirib.
Azərbaycan Kuboku, I təsnifat mərhələsi
“Sheki City” – “Araz Saatlı” 3:2
Qollar: Ü. Nağdalıyev, 46. C. İmamverdiyev, 87-p. S. Süleymanov, 89 – Y. Yusubov, 42. R. Əvəzov, 65-p.
“Qaradağ Lökbatan” – “Ağdaş” 8:0
Qollar: T. Zeynalov, 19-avtoqol. V.Hüseynov, 32. E.Əskərli, 45+1. R. Şahmuradov, 65; 67; 69. A. Məcidov, 86. S. Allahquliyev, 90.
“Dinamo” – “Kür-Araz” 3:2
Qollar: Ə. Səfərzadə, 57. Y. Qarayev, 72; 103 – E. Məmmədov, 5-p.; 49.
“Ağstafa Gəncləri” – “Şirvan” 1:0
Qol: E. Namazov, 49.
Sabah bu mərhələnin daha iki oyunu keçiriləcək:
“Göygöl” – “Şəmkir”
“Quba” – “Xankəndi”