“Şamaxı”nın baş məşqçisi Ayxan Abbasov Azərbaycan Kubokunun 1/4 final mərhələsində “Qarabağ” üzərində qazanılan sürpriz qələbəni (2:1) şərh edib. Məşqçi dumanlı və çətin hava şəraitinin hər iki komanda üçün maneə yaratdığını, lakin futbolçularının sona qədər mübarizə apardığını bildirib. O, xüsusilə ilk hissədə komandasının tapşırıqları daha dəqiq yerinə yetirdiyini qeyd edib.

Heyətin geniş olmadığını vurğulayan Abbasov, böyük rotasiyalar edə bilmədiklərini etiraf edib: “Sıx qrafikdə oynayırıq, yorğunluq qaçılmazdır. Lakin “Qarabağ” kimi rəqiblərlə qarşılaşmaq futbolçularımızın inkişafı üçün böyük şansdır”.

“Şamaxı”nın əsas hədəfinin Premyer Liqada mövqeyini qorumaq və daha yuxarı pillələrə qalxmaq olduğunu deyən mütəxəssis, Kubokda da mübarizəni davam etdirəcəklərini vurğulayıb: “Heç vaxt oyundan əvvəl təslim olmuruq. Amma real olsaq, bu cütün favoriti hələ də “Qarabağ”dır”.

Növbəti turlarda hava şəraiti pisləşərsə, oyunun təxirə salınması məsələsinə toxunan Abbasov, qərarların onlardan asılı olmadığını, lakin Şamaxıda bundan daha çətin hava şəraitində belə oyunların keçirildiyini xatırladıb.