Polşanın Katovitse şəhərində şahmat üzrə fərdi Avropa çempionatı həlledici mərhələyə qədəm qoyur. Qitənin ən güclülərinin mübarizə apardığı turnirdə Azərbaycan 13 şahmatçı ilə təmsil olunur.

 Yığmamızın heyətində həm təcrübəli qrosmeysterlər, həm də perspektivli gənclər mübarizə aparır: Aydın Süleymanlı, Nicat Abasov, Məhəmməd Muradlı, Read Səmədov, Xaqan Əhməd, Xəzər Babazadə, Şiroğlan Talıbov, Vüqar Manafov, Şahin Vəliyev, Ümid Aslanov, Gövhər Beydullayeva, Süleyman Süleymanlı və Əli Zuqanov.

Təmsilçilərimizdən Aydın Süleymanlı, Nicat Abasov və Read Səmədov hərəyə 4 xal toplamaqla ön sıralardakı mövqelərini qoruyurlar. Hazırda Süleymanlı 8-ci, Abasov 21-ci, Səmədov isə 29-cu pillədə qərarlaşıb. Bu gün çempionatın 6-cı turunun partiyaları oynanılacaq. Qeyd edək ki, turnir təkcə Avropa çempionu adını qazanmaq deyil, həm də Dünya Kubokuna vəsiqə əldə etmək baxımından böyük əhəmiyyət kəsb edir.

İsveçrə sistemi üzrə keçirilən və ümumilikdə 11 turdan ibarət olan yarış aprelin 19-da yekunlaşacaq.