Premyer Liqanın liderlərindən olan “Araz-Naxçıvan” bu gün səfərdə “Kəpəz”lə üz-üzə gələcək. Gəncə klubu hazırda böhran içindədir və daha çox meydandan kənar işlərlə məşğuldur. Bununla belə, “Araz-Naxçıvan” da qayğısız deyil. Cari mövsümə pis başlamayan Naxçıvan klubunun çiyinlərinə növbəti tur öncəsi durduğu yerdə əlavə qayğı yükləndi. Komandanın əsas qapıçısı Kristian Avram Moldova yığmasına həvəslə getsə də, oradan çökmüş vəziyyətdə qayıdıb. Norveç yığması Avramın qapısına müasir futbolda nadir rast gəlinən sayda – 11 qol vurub. Avram oyundan sonra “ölməyəcəm, güclü qalmalıyam. Amma 11 qol çoxdur” deməklə psixoloji durumunun yaxşı olmadığını büruzə verdi. “Araz Naxçıvan”ın məşqçi heyətinin Avramı özünə gətirmək və 11 qolun sadəcə qorxulu yuxu olduğuna inandırmaq üçün çox az zamanı var. Avramın nə gündə olduğunu öyrənməyə çalışsaq da, klubdan bir məlumat vermədilər. Görünür, Avram açıqlama verəcək halda deyil. Təbii, 11 qoldan sonra istənilən qapıçı özündə olmazdı. İndi “Araz”ın tək ümidi “Kəpəz”in yaranmış vəziyyətdən istifadə etməsinə mane olmaqdır.
