“Qarabağ”ın UEFA Çempionlar Liqasının əsas mərhələsində “Ayntraxt” üzərində qazandığı 3:2 hesablı qələbə, gözlənildiyi kimi, Almaniya mətbuatında böyük rezonans doğurub. Alman jurnalistlər bu nəticəni Frankfurt təmsilçisi üçün “Bakı şoku” kimi qiymətləndiriblər.

Alman idman mediası, əsasən, “Ayntraxt”ın müdafiə səhvlərinə və “Qarabağ”ın təslim olmayan xarakterini önə çəkiblər.

“Kicker”: Nüfuzlu nəşr “Bakıda nokaut” başlıqlı yazısında oyunu “Ayntraxt” üçün “acı son” adlandırıb. Məqalədə qeyd olunur ki, Dino Toppmöllerin gedişindən sonra müvəqqəti məşqçi Dennis Şmittin rəhbərliyi altında komanda ümidverici görünsə də, “Qarabağ”ın inadkarlığı qarşısında tab gətirə bilmədi. “Ayntraxt”ın pley-off ümidlərinin Tofiq Bəhramov adına stadionda “dəfn edildiyini” vurğulayıb.

“Bulinews”: “Qarabağ”ın son saniyədə dramatik qələbəni qopartdığını qeyd edərək, oyunun ssenarisini trillerə bənzədib. Xüsusilə, “Ayntraxt”ın hesabda irələi çıxmasından cəmi iki dəqiqə sonra “Qarabağ”ın hesabı bərabərləşdirməsi (2:2) və uzatma dəqiqələrində qələbə topunu vurması “frankfurtluların kövrək müdafiəsinin iflası” kimi qiymətləndirilib.

“Eurosport.de”: “Müdafiə kabusu” başlıqlı yazıda alman şərhçilər “Qarabağ”ın hücum xəttini, xüsusilə Abdullah Zubir və Elvin Cəfərquliyevin sol cinahdakı aktivliyini yüksək qiymətləndiriblər. Onlar qeyd ediblər ki, Azərbaycan çempionu rəqibin psixoloji gərginliyindən məharətlə istifadə etdi.

“ZDF” və digərləri: Oyundan əvvəl və sonra “Qarabağ”ı “Qafqazın Barselonası” kimi xarakterizə edən alman mətbuatı, Azərbaycan çempionunun texniki və hücumameyilli futbolunun “Ayntraxt”ın zəif müdafiəsini darmadağın etdiyini yazıb.