Azərbaycan Kanoe və Avarçəkmə Federasiyasının (AKAF) növbəti iclası keçirilib. Toplantıda ötən ilin yekunları müzakirə olunub və federasiyanın fəaliyyəti ilə bağlı bir sıra strateji qərarlar qəbul edilib.
İclasın əvvəlində baş katib Fərhad Əliyev çıxış edərək, ötən il ərzində federasiya tərəfindən həyata keçirilmiş layihələr, əldə olunmuş idman nəticələri və maliyyə hesabatını təqdim edib.
Gündəlikdə yer alan digər məsələlərin müzakirəsindən sonra aşağıdakı qərarlar təsdiqlənib.
Federasiyanın nəzdində Hakimlər Kollegiyası yaradılıb və İlqar Tağıyev kollegiyanın sədri seçilib. Aleksandr Jukovskinin kanoe üzrə milli komandanın baş məşqçisi vəzifəsinə təyin edilməsi rəsmiləşib. Akademik avarçəkmə üzrə yığmanın baş məşqçisi Volodimir Morozovun növbəti Olimpiya dövrü üçün fəaliyyətini davam etdirməsi qərara alınıb.
Həmçinin, iclasın gedişatında federasiyanın sıralarına yeni üzvlərin qəbul edilməsi məsələsi də həllini tapıb.