“Sabah”ın baş məşqçisi Valdas Dambrauskas Premyer Liqanın 22-ci turu çərçivəsində keçirilən və 3:3 hesabı ilə başa çatan “Qarabağ”la dramatik qarşılaşmanı şərh edib.
“3:0-dan sonra qələbəni əldən vermək məyusedicidir”
Təcrübəli mütəxəssis oyunun gedişatından və nəticədən danışarkən, qələbəni son anlarda əldən verdikləri üçün üzgün olduğunu bildirib:
“Matçdan əvvəl məşqçilər korpusu ilə söhbət edərkən görüşün 3:3 hesabı ilə bitə biləcəyini ehtimal etmişdik. Təəssüf ki, 3:0 hesabı ilə öndə olmağımıza baxmayaraq, bu üstünlüyü qoruya bilmədik. Bəli, bizə çox çətin idi. Burada ‘Qarabağ’ın təcrübəsi öz sözünü dedi – son 20 dəqiqədə meydanda onların təcrübəsi danışırdı. Çox məyusuq. Bir yolunu tapıb qələbəni qorumalıydıq, lakin bacarmadıq”.
Dambrauskas bu oyunun komandası üçün böyük dərs olduğunu vurğulayıb: “Qarşıda bizi həm kubok, həm də çempionat oyunları gözləyir. İndi daha yaxşı hazırlaşmalı və doğru oynamalıyıq. 70-ci dəqiqəyə qədər öndə olsaq da, rəqib möhtəşəm geri dönüş (kambek) etdi. Azarkeşlərə də təşəkkür edirəm, amma tribunadakı boş yerlərə görə üzgünəm. Belə oyunlar bəzən Çempionlar Liqası matçlarından daha maraqlı və gərgin keçir. Bu gün meydanda hər şey var idi: intriqa, dram”.
“Biz bir xal qazanmadıq, iki xal itirdik“
Baş məşqçi 3 qolluq üstünlükdən sonra alınan bərabərliyi itki kimi qiymətləndirib: “Əgər məndən bunu oyundan əvvəl soruşsaydınız, fərqli cavab verərdim. Lakin 3:0-dan sonra biz bir xal qazanmadıq, iki xal itirdik. “Qarabağ”ı bu geri dönüşə görə təbrik edirəm. Ümid edirəm ki, bir daha belə səhvlərə yol verməyəcəyik”.
Müşfiq Hüseynova qarşı qeyri-etik hərəkət və üzrxahlıq
Oyunda baş verən xoşagəlməz insidentə də toxunan Dambrauskas, köməkçisinin rəqib komandanın məşqçisi, Azərbaycan futbolunun əfsanəsi Müşfiq Hüseynova qarşı etdiyi hərəkətə görə üzr istəyib: “Düzünü desəm, mən o anı görmədim, çünki diqqətim meydanda idi. Sadəcə ehtiyat oyunçular skamyasında hamının ayağa qalxdığını gördüm. “Sabah” klubu olaraq biz belə məsələlərdə heç vaxt tolerant olmayacağıq. Bizim üçün hörmət və ‘fair-play’ qaydaları hər şeydən üstündür”.
Qısa müddətdə buraxılan qollar və hakimlik barədə
12 dəqiqə ərzində 3 qol buraxmalarını konsentrasiya çatışmazlığı və rəqibin gücü ilə əlaqələndirən məşqçi, Xəyal Əliyevin fasilədə əvəzlənməsinin səhhəti ilə bağlı məcburi bir addım olduğunu deyib. Sonda hakimlik barədə danışan mütəxəssis kəskin tənqiddən yayınıb: “Hakimlərin səhvlərinə cavabdeh olan komitə sədri var. Hamımız insanıq, səhv edə bilərik. Ümid edirəm ki, qərəzli səhvlər olmayıb. Mən öz futbolçularımın səhvlərinə görə məsuliyyət daşıyıram, hakimlərin işini isə aidiyyəti qurumlar təhlil etməlidir”.