Futbol dünyasının pərdəarxası məqamlarında Çempionlar Liqasının Səudiyyə Ərəbistanı klubları hesabına genişləndirilməsi ideyası yenidən gündəmə gəlib. Ölkə çempionatına yatırılan nəhəng investisiyalardan sonra bu ehtimal artıq fantastik görünmür.

“Əl-Hilal”ın baş direktoru Esteve Kalsada “AS” nəşrinə müsahibəsində klubun bu ssenariyə olduqca müsbət yanaşdığını təsdiqləyib: “Bu, bizim çox xoşumuza gələrdi. Klublararası Dünya Çempionatı bizim üçün əla bir vitrin və səviyyəmizi nümayiş etdirmək üçün böyük fürsət oldu. Orada təkcə “Real“la oyunda gücümüzü göstərmədik, həm də “Mançester Siti”ni mübarizədən kənarlaşdırdıq. İstərdik ki, bu cür hallar daha tez-tez baş versin, öz səviyyəmizi davamlı göstərək və ən əsası, dünyada tanınaq”.

Kalsada həmçinin komandanın rəqabətədavamlılığına tam əmin olduğunu bildirib: “Biz artıq böyük klublala rəqabət aparmışıq və potensialımızı sübut etmişik. Turnirə vəsiqə qazanmaq asan deyil, lakin əminəm ki, Avropa Çempionlar Liqasında çıxış etsəydik, hər kəsə ciddi müqavimət göstərərdik. Çünki heyətimizə nəzər salsanız, komandamızın ÇL səviyyəsdə olduğunu görərsiniz”.