“Kayzerslautern”in oktyabr ayından bəri səfərdə qazandığı ilk qələbə, son iki həftənin uğursuzluqlarını unutduraraq komandaya itirilmiş özünəinamı qaytardı. “Prussiya Münster” üzərindəki 3:2 hesablı dramatik qələbədə əsas diqqət mərkəzində olan şəxs təkcə ağır həftəni geridə qoyan Norman Bassett deyildi. Zədə səbəbindən üç aydan çox yaşıl meydanlardan uzaq qalan Mahir Emrəli, möhtəşəm qayıdışı ilə futbola nə qədər “ac” olduğunu nümayiş etdirib. Der-Betze-brennt portalına açıqlama verən milli komandamızın forvardı çətin günləri geridə qoyduğunu bildirib: “Mənim üçün həqiqətən ağır bir dövr idi. Reabilitasiya prosesində yanımda olan, mənə dəstək verən hər kəsə minnətdaram. Hazırda fiziki formamı 85-90 faiz bərpa etdiyimi hiss etsəm də, motivasiyam 100 faizdir. Meydanda daha çox vaxt keçirmək və bu mövsüm vurduğum qollarla komandama maksimum fayda vermək istəyirəm”.