Şahmat üzrə Azərbaycan çempionatı özünün həlledici mərhələsinə qədəm qoyub. Paytaxtda keçirilən gərgin mübarizənin ardından, bu gün həm kişi, həm də qadın şahmatçılar arasında final seriyasının ilk partiyalarına start veriləcək.

Kişilərin yarışında əsas diqqət mərkəzi final qarşılaşması olacaq. Turnirin reytinq-favoriti, dünya şöhrətli qrosmeysterimiz Şəhriyar Məmmədyarov qızıl medal uğrunda gənc və perspektivli Məhəmməd Muradlı ilə üz-üzə gələcək. Təcrübə ilə gəncliyin bu dueli çempionatın ən maraqlı hadisəsi hesab olunur.

Qadınların mübarizəsində isə son illərin uğurlu ismi Ülviyyə Fətəliyeva ölkə çempionu adını qazanmaq üçün Ayan Allahverdiyeva ilə qüvvəsini sınayacaq.

Eyni zamanda, üçüncü yer uğrunda görüşlər də baş tutacaq. Kişilər arasında Aydın Süleymanlı Read Səmədovla, qadınlar arasında isə Gülnar Məmmədova Türkan Məmmədyarova ilə güclünü müəyyənləşdirəcək.