Şahmat üzrə ölkə çempionatında 1/8 final mərhələsinin ilk oyunları başa çatıb. Şahmat Federasiyasının məlumatına görə, kişilərin mübarizəsində bəzi favoritlər xal itkisi ilə üzləşib, qadınların yarışında isə maksimum məhsuldarlıq qeydə alınıb.
 Turnirin əsas reytinq favoriti Şəhriyar Məmməyarov Murad İbrahimli ilə, son ölkə çempionu Rauf Məmmədov isə Şiroğlan Talıbovla heç-heçə edib. Eltac Səfərli, Aydın Süleymanlı, Məhəmməd Muradlı, Read Səmədov və Əhməd Əhmədzadə ilk partiyada rəqiblərini məğlub edərək üstünlük qazanıblar. Dünya Kubokunun mükafatçısı Nicat Abasov isə ilk partiyada Xaqan Əhmədə məğlub olaraq azarkeşləri təəccübləndirib.
Qadın şahmatçıların mübarizəsində bütün masalarda oyunlar qələbə ilə başa çatıb və heç bir qarşılaşmada heç-heçə qeydə alınmayıb. Son çempion Günay Məmmədzadə Nərmin Kazımovanı, Avropa çempionu Ülviyyə Fətəliyeva isə Zəhra Allahverdini məğlub edib. Digər görüşlərdə Gövhər Beydullayeva, Xanım Balacayeva, Gülnar Məmmədova, Türkan Məmmədyarova, Ayan Allahverdiyeva və Səbinə İbrahimova da günü qələbə ilə tamamlayıblar.
Bu gün şahmatçılar 1/8 finalın cavab partiyaları üçün yenidən masa arxasına əyləşəcəklər. Çempionatın bütün oyunları hər gün saat 15:00-da start götürür.