UEFA, Maliyyə Fair Play (FFP) kriteriyaları çərçivəsində “Fənərbaxça” klubunun maliyyə fəaliyyətini ciddi nəzarətə götürüb. Klubun iqtisadi göstəricilərini və hesabatlarını yerindəcə araşdırmaq məqsədilə İstanbula xüsusi nümayəndə heyəti ezam olunub. “Türkiye” qəzetinin əməkdaşı Tahir Kumun məlumatına görə, bu yoxlama həm miqyasına, həm də diqqət yetirilən detallara görə klub üçün böyük əhəmiyyət kəsb edir. Bu təftişin ən kritik bəndi isə Kerem Aktürkoğlunun “Benfika”dan “Fənərbaxça”ya keçidi ilə bağlıdır. UEFA-nın bu transferin maliyyə şəffaflığına xüsusi diqqət yetirdiyi vurğulanır. Müfəttişlər transferin aşağıdakı detallarını araşdırır: futbolçu ilə imzalanan müqavilənin şərtləri, transfer üçün cəlb olunan sponsorluq vəsaitləri, ödənişlərin icra qrafiki və mənbələr.

“Fənərbaxça”nın hər üç aydan bir təqdim etdiyi mütəmadi hesabatlardan fərqli olaraq, bu xüsusi yoxlamanın nəticələri mart ayında keçiriləcək böyük maliyyə qiymətləndirməsində əsas götürüləcək. UEFA, təkcə klubun təqdim etdiyi sənədlərlə kifayətlənməyərək, ictimaiyyətdə dolaşan iddiaları və şikayətləri də nəzərə alacaq. Bu məqsədlə Türkiyə Futbol Federasiyasından (TFF) rəsmi məlumatlar və hesabatlar tələb olunacaq.

Bu araşdırmanın nəticələri klubun gələcək transfer siyasətinə və Avropa turnirlərindəki iştirak statusuna birbaşa təsir göstərə bilər.