Bu gün Qətərin paytaxtı Doha şəhərində şahmatın rapid (sürətli) və blits növləri üzrə Dünya Çempionatına start verilib. İlin ən mühüm şahmat hadisələrindən biri sayılan bu turnirdə ölkəmiz geniş heyətlə təmsil olunur.
Şahmat Federasiyasından verilən məlumata görə, mundialda ölkəmizin şərəfini ümumilikdə 17 zəka sahibi qoruyur.
Yarışın reytinq favoritləri arasında yer alan təmsilçilərimiz iki qrupda mübarizə aparırlar:
Kişilərin yarışı: Şəhriyar Məmmədyarov, Teymur Rəcəbov, Eltac Səfərli, Rauf Məmmədov, Nicat Abasov, Məhəmməd Muradlı, Xaqan Əhməd, Read Səmədov və Murad İbrahimli.
Qadınların yarışı: Günay Məmmədzadə, Ülviyyə Fətəliyeva, Gülnar Məmmədova, Gövhər Beydullayeva, Xanım Balacayeva, Zeynəb Məmmədyarova, Türkan Məmmədyarova və Mələk İsmayıl.
Dünyanın ən güclü şahmatçılarının bir araya gəldiyi çempionatın ümumi mükafat fondu 1 000 000 ABŞ dolları təşkil edir. Yarışlar dekabrın 30-na qədər davam edəcək və qaliblər həm rapid, həm də blits növləri üzrə müəyyənləşəcək.