Ölkə kubokunun 1/8 finalında “Karvan-Yevlax”la qarşılaşan “Qarabağ” gözlənilmədən ciddi müqavimıtlə üz-üzə qaldı. İlk yarıda yevlaxlılar nəinki müqavimət göstərə bildi, hətta hücumda da fəal oynayaraq heç bir komponentdə rəqibindən geri qalmadı. Nəticədə ilk yarı qolsuz başa çatdı.

İkinci yarı şərti ağdamlılar təzyiqi artırdı və bir neçə dəfə təhlükəli vəziyyət yaratdılar. Qurban Qurbanovun komandasının üstünlüyü yalnız 80-ci dəqiqədə öz bəhrəsini verdi. Nəriman Axundzadə sağ cinahdan irəliləyərək topu yaxın küncə göndərdi. Ötən həftəsonu yevlaxlıları Premyer Liqa oyununda məyus edən gənc hücumçu bu dəfə də fərqləndi. Bu qol sanki yevlaxlıları ruhdan saldı və az keçməmiş Elvin Yunuszadə Leandro Andradenin asmasını başla öz qapısına yönəltdi. Elvin də deyəsən Nərimandan geri qalmamaq üçün bu komandaların qarşılaşmasından qolsuz getmək istəmədi. Mövsümün əvvəlində məhz “Qarabağ”la oyunda da Yunuszadə avtoqol etmişdi. 88-ci dəqiqədə Nəriman Axundzadə dubla imza atdı.

Azərbaycan Kuboku, 1/8 final

“Qarabağ” – “Karvan-Yevlax” 3:0
Bakı, “Azərsun Arena” stadionu
Baş hakim: Əliyar Ağayev
Qollar: N. Axundzadə, 80; 88. E. Yunuszadə, 83-avtoqol.