Özbəkistanın paytaxtı Daşkənddə qadın sablyaçılar arasında keçirilən Dünya Kubokuna komanda yarışları ilə yekun vurulub. Ölkəmizin qadınlardan ibarət milli komandası turniri dünyanın ən güclü 10 kollektivi sırasında tamamlayıb.

Polina Kaspiaroviç, Səbinə Kərimova və Zərifə Hüseynovadan ibarət sablya yığmamız yarışa iddialı start verib. Turnirin 1/8 final mərhələsində millimizin rəqibi ABŞ seçməsi olub. Gərgin keçən qarşılaşmada qızlarımız sonradan turnirin finalına qədər yüksələn rəqibinə 32:45 hesabı ilə məğlub olaraq, mübarizəni 9-16-cı yerlər uğrunda davam etdirib.

9-16-cı yerlər uğrunda keçirilən görüşlərdə sablyaçılarımız yüksək əzm nümayiş etdiriblər. İlk olaraq meydan sahibi Özbəkistan seçməsini 45:39 hesabı ilə üstələyən millimiz, növbəti mərhələdə Ukrayna yığması ilə üz-üzə gəlib və bu dueldə 45:42 hesablı qələbə qazanan təmsilçilərimiz 9-cu yer uğrunda həlledici matça vəsiqə qazanıblar.

Doqquzuncu pillə uğrunda keçirilən qarşılaşmada sablyaçılarmız Macarıstan yığması ilə qarşılaşıblar. Görüşün son saniyələrinə qədər davam edən intriqa rəqibin xeyrinə yekunlaşıb (43:45). Bu nəticə ilə qadın millimiz Dünya Kubokunu 10-cu pillədə başa vurub.