Qətərin paytaxtı Doha şəhərində şahmatın rapid və blits növləri üzrə dünya çempionatına start verilib. İlin ən nüfuzlu idman hadisələrindən sayılan bu turnirdə ölkəmiz ümumilikdə 17 şahmatçı ilə təmsil olunur.

Yarışın start mərhələsində qrossmeysterlərimiz uğurlu gedişlərlə yadda qalıblar. Kişilər arasında keçirilən rapid yarışlarında 5 turdan sonra Rauf Məmmədov 3,5 xal toplayaraq 22-ci pillədə qərarlaşıb. Bu, hazırda şahmatçılarmız arasında ən yüksək göstəricidir.

Qadınların mübarizəsində isə 4 turun yekunlarına əsasən, Zeynəb Məmmədyarova 3 xal toplayaraq 25-ci yerdə mövqeyini möhkəmləndirib.

Dünyanın ən güclü zəka sahiblərini bir araya gətirən mundialın ümumi mükafat fondu 1 milyon ABŞ dolları təşkil edir. Proqrama əsasən, ilk günlərdə rapid üzrə qaliblər müəyyənləşəcək, daha sonra isə şahmatçılar blits növündə qüvvələrini sınayacaqlar.

Dekabrın 30-dək davam edəcək dünya çempionatında həlledici qarşılaşmalar hələ qabaqdadır.