“Ayaks”ının baş məşqçisi Fred Qrim Bakıda “Qarabağ”a qarşı UEFA Çempionlar Liqasının əsas mərhələsinin VI tur matçından öncə mətbuat konfransında Bakıya qələbə üçün gəldiyini bildirib.

-Biz bütün oyunlarımızda yalnız qalib gəlmək istəyirik. Həm sabahkı matçda, həm də digər qarşılaşmalarda. Xüsusilə də 7 xalı olan “Qarabağ”a qarşı oynamaq bizim üçün çox vacibdir. “Qarabağ”ı kifayət qədər analiz etmişik. Bu mövsüm balanslı komandadır və çox sürətli şəkildə hücuma çıxma qabiliyyətləri var. Biz bunları nəzərdən keçirmişik və onlara qarşı müəyyən planlarımız mövcuddur. Sabah elə bir oyun olacaq ki, həm qalib gələ bilərik, həm də uduzma ehtimalı var. Hər iki nəticəyə hazırıq.

Fred Qrim “Qarabağ”dan kiminsə adını çəkməyin düzgün olmadığını bildirib.

-Onların kifayət qədər güclü müdafiəsi var və çox yaxşı, sürətli hücumlar qura bilirlər. Lakin sabahkı oyundan qorxmuruq. Baxmayaraq ki, hazırda 0 xalımız var, biz bu matçı istifadə edib xal qazanmağa çalışacağıq.