Jurnalist Pipe Syerra xəbər verir ki, Kolumbiya millisinin ulduzu Xames Rodriges Fransa yığmasına qarşı keçirilən yoldaşlıq oyunundan sonra xəstəxanaya yerləşdirilib. Hazırda o, Minnesota ştatındakı klinikalardan birində həkim nəzarətindədir.

Məlumata görə, hospitalizasiyaya səbəb futbolçunun orqanizminin kəskin susuzlaşması olub. Maraqlıdır ki, qarşılaşma ABŞ-ın şərqində, Merilend ştatının Lendover şəhərində baş tutsa da, futbolçunun vəziyyəti komandasının məskunlaşdığı Minnesotada pisləşib. Bazar ertəsindən etibarən xəstəxanada olan 34 yaşlı yarımmüdafiəçi hazırda profilaktik və reabilitasiya xarakterli müalicə kursu keçir. Həkimlər futbolçunun vəziyyətinin stabil olduğunu və tezliklə yaşıl meydanlara qayıda biləcəyini ehtimal edirlər.

Xatırladaq ki, “Real”ın sabiq ulduzu bu qış transfer pəncərəsində Meksikanın “Leon” klubundan “Minnesota Yunayted”ə keçib. MLS təmsilçisinin heyətində hələlik cəmi 2 oyuna çıxan kolumbiyalı pleymeyker, hələ ki, məhsuldar göstəricilərlə yadda qala bilməyib.