Yanvarın 3-də keçiriləcək Kataloniya derbisi ərəfəsində “Espanyol” təhlükəsizlik tədbirlərini maksimuma çatdırıb. “Marca” nəşrinin verdiyi məlumata görə, klub rəhbərliyi fanat sektorunda xüsusi qoruyucu şəbəkə quraşdırmaq qərarına gəlib. Bu addım meydançaya kənar əşyaların atılmasının, xüsusən də hədəf nöqtəsində olan qapıçı Joan Qarsiyanın zədələnməsinin qarşısını almaq məqsədi daşıyır.

Xatırladaq ki, “Espanyol”un öz yetirməsi olan Qarsiya ötən yay transfer pəncərəsində 25 milyon avro qarşılığında əzəli rəqib “Barselona”ya keçərək azarkeşlərin qəzəbinə tuş gəlmişdi. Hazırda La Liqada 5-ci pillədə qərarlaşan “ağ-mavilər” bu gərgin qayıdışın komandanın uğurlu çıxışına və daxili nizam-intizamına xələl gətirməsindən ehtiyat edirlər.