“Araz-Naxçıvan” Premyer Liqanın son turunda prinsipial rəqibi “Neftçi”yə minimal hesabla məğlub olaraq vacib xallar itirdi. Qarşılaşmadan sonra təşkil olunan mətbuat konfransında komandasının çıxışını dəyərləndirən məşqçi Vadar Nuriyev, xüsusilə ikinci hissədəki oyundan razı qaldığını və turnir cədvəlindəki iddialarını sonadək sürdürəcəklərini bildirib.

Məşqçi komandasının hər iki hissədəki performansını dəyərləndirərək, matça qələbə üçün çıxdıqlarını vurğulayıb: “Bu görüşə final gözü ilə baxırdıq və məqsədimiz üç xal idi. Etiraf etməliyəm ki, ilk hissədə rəqib bizdən daha üstün göründü. Lakin fasilədən sonra etdiyimiz əvəzləmələr bəhrəsini verdi və oyunda dönüş yarada bildik. Cinah oyunçularının yoxluğuna rəğmən, ikinci hissədə sərgilədiyimiz futbol və vurduğumuz qol məni razı saldı. ‘Neftçi’ni qələbə münasibətilə təbrik edirəm”.Nuriyev komandanın turnir cədvəlindəki mövqeyi və avrokubok perspektivləri barədə gələn suala nikbin cavab verib: “Avrokubok qatarının artıq getdiyini deməzdim. Qarşıda hələ 6 tur var və bu, kifayət qədər böyük xal ehtiyatı deməkdir. Rəqiblərimiz də xallar itirəcək. Odur ki, mübarizədən tam kənarda qaldığımızı düşünmürəm. Sonadək şansımızı qorumağa çalışacağıq”.