Məhəmməd Salah ardıcıl üçüncü matçda ehtiyat oyunçular skamyasında qaldıqadan sonra “Liverpul”un baş məşqçisi Arne Slotu tənqid edib: “İnana bilmirəm, çox məyus oldum. Burada olduğum illərdə klub üçün çox şey etmişəm, xüsusən də ötən mövsümdə. Bunu hamı gördü…İndi ehtiyatda otururam, niyə? Səbəbini bilmirəm. Hiss edirəm ki, klubum məni məyus edir”

Daha sonra o, məşqçi ilə münasibətlərinə toxunub: “Onunla münasibətlərimin yaxşı olduğunu dəfələrlə demişəm. Ancaq indi bu münasibət mövcud deyil. Niyə, bilmirəm. Düzünü desəm, bu, mənim üçün qəbuledilməzdir. Hər şeydə Mo günahkardır, çünki problem odur. Düşünmürəm ki, problem məndədir. Dünən anamla danışanda ona oynamayacağımı dedim. Siz bunu bilməsəniz də, mən bilirdim. Anama dedim ki, növbəti matça gəlsin, bu mənim klubda sonuncu oyunum ola bilər”.

Bütün bunlar, 33 yaşlı Salahın tezliklə “Liverpul”dan ayrılacağından xəbər verir. Onun adı Səudiyyə Ərəbistanı ilə yanaşı çəkilsə də, Fichajes-in məlumatına görə forvardın Avropa seçimi də var. Belə ki, “Qalatasaray”ın forvard üçün anlaşma hazırladığı və yanvarın əvvəlində ona təklif göndərəcəyi bildirilir.

İstanbul “aslanlar”ının Salaha mövsüm başına təxminən 20-22 milyon dollar, üstəgəl gəlirli sponsor müqavilələri və əsas fiqur olacağı idman layihəsi təklif edəcəkləri söylənilir.