“Neftçi”nin və millinin gənc qapıçısı Rza Cəfərovun karyerasını xaricdə davam etdirmək variantı yenidən gündəmə gəlib. 20 yaşlı qolkiperin xidmətində Finlandiyanın ən titullu klubu olan HİK maraqlıdır. Karyerasında yeni səhifə açmağa müsbət yanaşan Rza Cəfərov üçün əsas meyar daimi çıxış edə biləcəyi komandada yer almaqdır. Məhz bu səbəbdən o, ölkə daxilindən gələn təkliflərə tələsik cavab vermir. “Radarlar” Cəfərovu heyətinə qatmaq istəsə də, gənc qapıçı orada Salahat Ağayevin rəqabəti fonunda ehtiyatda qalmaq riskini nəzərə alaraq qərar verməyə tələsmir. İstedadlı qapıçının “Neftçi” ilə hazırkı müqaviləsi 30 iyun 2027-ci ilə qədər qüvvədədir. Bu isə o deməkdir ki, HİK və ya hər hansı digər klub transfer üçün “ağ-qaralar”la  razılığa gəlməlidir.

Rza Cəfərovun HİK-ə keçidi reallaşarsa, o, son illərdə Avropaya yollanan azsaylı azərbaycanlı qapıçılardan biri olacaq. Finlandiya çempionatı gənc futbolçular üçün Avropanın daha böyük liqalarına (məsələn, Skandinaviya və ya Belçika) keçid etmək üçün əla tramplin hesab olunur.  HİK-in mütəmadi olaraq avrokubokların qrup mərhələsində çıxış etməsi Cəfərovun beynəlxalq təcrübə qazanması baxımından böyük üstünlük ola bilər.