“Sabah” qış transfer pəncərəsində heyətini ciddi bir sima ilə gücləndirir. “Bayquşlar” bir müddətdir danışıqlar apardığı qabonlu mərkəz hücumçusu Orfe Mbina ilə tam razılıq əldə edib. 25 yaşlı futbolçu artıq Bakıdadır və tibbi müayinədən keçdikdən sonra rəsmi müqaviləyə imza atacaq.
Mbinanın karyerası Avropanın müxtəlif liqaları ilə zəngindir. Futbolçu karyerasının böyük hissəsini Fransada keçirib. “Şamalyer”, “Bove” və xüsusilə “Nim” klublarındakı çıxışı ilə diqqət çəkib. Onun son dayanacağı Sloveniyanın ən köklü klublarından olan “Maribor” olub. Burada beynəlxalq oyun təcrübəsi qazanıb. Mbina həmçinin Qabon milli komandasının üzvüdür və hücum xəttində Pyer-Emerik Obameyanq kimi ulduzlarla birgə çıxış edib. Boyu və fiziki gücü ilə seçilən (185 sm) Mbina, “Sabah”ın hücumda daha aqressiv oynamasına kömək edə bilər. Onun atletik quruluşu standart vəziyyətlərdə rəqib müdafiəsi üçün təhlükə yaradır. O, həm mərkəz hücumçusu, həm də hücumun cinahlarında oynamaq qabiliyyətinə malikdir. Mbinanın gəlişi komandadakı daxili rəqabəti artıracaq və çempionluq yolunda liderliyin qorunub saxlanılması üçün vacib amilə çevrilə bilər.