“Qəbələ”nin baş məşqçisi Kaxaber Tsxadadze ölkə kubokunun 1/4 final mərhələsində “Sabah”a qarşı keçirilən dramatik cavab oyunundan sonra fikirlərini bölüşüb. Təcrübəli mütəxəssis komandasının penaltilər seriyasındakı çıxışına toxunaraq, son ana qədər uğura inandığını bildirib: “Düzünü desəm, qələbənin artıq bizimlə olduğunu düşünürdüm. Penaltilər seriyasında yaxşı çıxış edəcəyimizə ümid edirdim. Çempionatdakı son iki oyunumuzu nəzərə alsaq, belə nəticə gözləmirdim. Penalti psixologiya məsələsidir. Məsələn, Murad Musayev adətən topu digər küncə vurur, amma bu dəfə alınmadı. Onun zərbəsi məni də təəccübləndirdi. Futbolçular məşqlərdə etdiklərini gərginlik səbəbindən oyunda təkrarlaya bilmədilər”.

Tsxadadze ikinci hissənin əvvəlində Adriel Ba Luanın meydandan qovulmasına və digər mübahisəli məqamlara da münasibət bildirib: “AFFA bu məsələni araşdırmalıdır. Mənə elə gəlir ki, həmin epizoddan əvvəl qayda pozuntusu var idi. Hakim yanaşmaları fərqli ola bilər, amma geri qayıtmaq mümkün deyil. Akinadenin üzünə zərbə endirilən anı da qeyd etməliyəm. Şəxsi fikrimcə, orada da qırmızı vərəqə verilməli idi. Bu məqamlar ciddi təhlil tələb edir”.

Oyunun keyfiyyətindən razı qalan məşqçi, əsas hədəfə fokuslandıqlarını vurğulayıb: “Çox maraqlı oyun alındı, çoxlu qollar və fürsətlər izlədik. Futbolçularım həm xarakter, həm də oyun baxımından əllərindən gələni etdilər. Belə matçlar çempionatın səviyyəsi üçün vacibdir. İndi bizim əsas hədəfimiz Premyer Liqada qalmaqdır. Maraqlıdır ki, növbəti matçımızda da rəqibimiz yenə ‘Sabah’ olacaq”.

O, həmçinin oyundan sonrakı emosiyalarından danışaraq, hələ futbolçu olduğu illərdən bəri adrenalin səbəbindən oyun gecələri yata bilmədiyini zarafatla qeyd edib.