“Gənclik şəhəri” təmsilçisi “Sumqayıt” Premyer Liqanın ikinci yarısına hazırlaşmaq üçün Türkiyəyə yola düşüb. Saşa İliçin rəhbərliyi altında baş tutacaq Antalya toplanışında komandanı ciddi sınaqlar gözləyir.

Qış fasiləsini səmərəli dəyərləndirmək istəyən “Sumqayıt” bu gündən etibarən Antalyada məşqlərə başlayıb. Komandanın qardaş ölkədəki hazırlıq prosesi yanvarın 17-nə qədər davam edəcək. Baş məşqçi Saşa İliç bu müddət ərzində futbolçuların fiziki formasını bərpa etməklə yanaşı, yeni taktiki sxemləri də sınaqdan keçirməyi planlaşdırır.

Toplanış müddətində “Sumqayıt” üç yoldaşlıq görüşü keçirəcək. Rəqiblərin hər biri öz ölkələrinin yüksək liqalarında iddialı mövqelərdə qərarlaşan klublardır. “Pakş”  cari mövsümdə göstərdiyi yüksək performansla Macarıstan çempionatının ən diqqətçəkən komandalarından biri.  “OFK” Serbiyanın köklü klublarından biridir və  bu rəqiblə oyun İliç üçün xüsusi əhəmiyyət kəsb edir.

“Osiyek” Xorvatiya futbolunun güclü təmsilçilərindən biridiir və “Sumqayıt” üçün son sınaq olacaq.

Mütəxəssislərin fikrincə, rəqiblərin səviyyəsi “Sumqayıt”ın ikinci dövrəyə necə daxil olacağından xəbər verəcək. Saşa İliç üçün bu toplanış həm də heyətdəki boşluqları görmək və mümkün transfer ehtiyaclarını müəyyənləşdirmək üçün ideal fürsətdir. Komandanın yanvarın 17-də toplanışı başa vuraraq Bakıya daha güclü qayıdacağı gözlənilir.