Özbəkistanın paytaxtı Daşkənddə keçirilən cüdo üzrə “Böyük Dəbilqə” turniri Azərbaycan millisi üçün həm böyük sevinclə, həm də gözlənilməz intizam problemi ilə yadda qalıb. Turnirin ikinci günündə bütün diqqətlər 81 kq-da möcüzələr yaradan Ömər Rəcəbliyə yönəlsə də, dünya reytinqinin lideri Hidayət Heydərovun başına gələnlər idman ictimaiyyətində şok effekti yaradıb.
Liderin peşəkarlığa yad səhvi: Heydərovun böyük uğursuzluğu
Ölkəmizin cüdo məktəbinin əsas simalarından biri, 73 kq çəki dərəcəsində dünya reytinqinə başçılıq edən Hidayət Heydərovun tatamiyə çıxa bilməməsi Daşkənd turnirinin ən çox müzakirə olunan hadisəsinə çevrilib. Təəssüflə qeyd etməliyik ki, təcrübəli idmançımız çəkiölçmə mərasimində müəyyən olunmuş normanı keçdiyi üçün yarışdan kənarlaşdırılıb.
Dünya lideri statusunu daşıyan bir atletin belə bir texniki və intizamsız səhvə yol verməsi peşəkarlıq prinsiplərinə tamamilə yaddır. Bu səviyyədə bir idmançının çəki balansını qoruya bilməməsi nəinki qazanılacaq medalın itirilməsi, həm də dövlətin və məşqçilər heyətinin çəkdiyi əməyin boşa çıxması deməkdir. Reallıq budur ki, turnirin ən böyük favoritlərindən biri hesab olunan Hidayət, rəqibinə deyil, öz intizamsızlığına məğlub olaraq azarkeşləri dərin məyusluğa uğratdı.
Ömər Rəcəblidən “Böyük Dəbilqə” dərsi
Hidayətin uğursuzluğunun fonunda Ömər Rəcəbli (81 kq) öz çıxışı ilə azarkeşlərin könlünü alıb. O, finala gedən yolda dünyanın ən güclü cüdo məktəblərinin nümayəndələrini sıradan çıxarıb. 1/4 finalda Sotaro Fujivaranı (Yaponiya) məğlub edərək rəqiblərinə göz dağı verdi. Yarımfinalda özbəkistanlı Arslonbek Tojiyevi bütün zalın önündə məğlub edərək finala adladı. Ömər indi Daşkənd qızılı üçün son addımını atacaq.
Gözlənilən və gözlənilməyən məğlubiyyətlər
Təəssüf ki, günün digər təmsilçiləri eyni uğuru təkrarlaya bilməyiblər. Kamran Süleymanov (73 kq) yapon rəqibinə, Fidan Əlizadə (63 kq) isə italyan rəqibinə 1/8 finalda uydublar. Sudaba Ağayeva (70 kq) isə elə ilk görüşdəcə turnirlə vidalaşıb.
Ümumi vəziyyət: millimiz hələ də liderlər sırasındadırBütün eniş-yoxuşlara baxmayaraq, Azərbaycanın aktivində artıq 1 qızıl (Əhməd Yusifov) və 1 gümüş (Balabəy Ağayev) medal var. Ömər Rəcəblinin final qarşılaşması millimizin ümumi komanda hesabındakı yerini daha da yüksəldə bilər.