Bu gün Çempionlar Liqasının əsas mərhələsində 6-cı tura start veriləcək və ilk oyun günündə 9 görüş keçiriləcək. Qrup turniri finiş xəttinə yaxılaşdıqca qazanılan və itirilən xalların da dəyəri artır. Beləki, getdikcə vəziyyəti düzəltmək üçün şans azalır. “Monako” – “Qalatasaray” qarşılaşması mərhələ adlamaq istəyində olan hər iki komanda üçün böyük önəm daşıyır. Hazırda hesabında 6 xalı olan “Knyazlıq klubu” pley-offa vəsiqə qazanmaq üçün şübhəsiz, meydana 3 xal qazanmaq məqsədi ilə çıxacaq. Belə ki, monakoluları qarşıda “Real” və “Yuventus”la çətin oyunlar gözləyir. Bu səbəbdən matç “sarı-qırmızılı”lar üçün asan olmayacaq. Son turda evdə “Union Qallios”a minimal hesablı məğlubiyyət “aslanlar”ın işini çətinə saldı. İndi onlar Monako səfərindən əliboş dönməməlidir, əks halda “Qalatasaray”ın pley-off arzusu xəyal olaraq qala bilər. “Qalatasaray”ı qarşıda “Atletiko” ilə ev, “Mançester Siti” ilə səfər oyunu gözləyir. Aralarındakı oyunlara gəlincə, üstünlük “Monako”nun tərəfindədir. Bu rəqiblər sonuncu dəfə 2000-ci ildə üz-üzə gəlib və indiyədək öz aralarında keçirdikləri 6 matçın 3-də “Monako”, 1-də isə “Qalatasaray” qələbə qazanıb. Üstəlik, monakolular türk klublarına qarşı keçirdikləri son 5 oyunun 4-də qələbə qazanıb və yalnız 1-də uduzub. Monakolular qazandığı görüşlərdə türklərin qapısına ən azı 3 qol vurublar. “Qalatasaray” isə fransızlara qarşı 11 səfər oyununda yalnız ikisində qələbə qazanıb və yeddisində uduzub.
Günün digər mərkəzi qarşılaşması “İnter” – “Liverpul” matçıdır. Bu görüş yalnız qitənin iki nüfuzlu klubunun qarşılaşması yox, həm də son turda “Qarabağ”a rəqib olacaq “Liverpul”un oyunu baxımından maraq doğurur. Hazırda ingilis klubunun durumu yaxşı deyil və Arne Slotun komandası bütün turnirlərdə keçirdiyi son 15 oyunun yalnız 4-də qələbə qazanıb və 9-da meydanı məğlub tərk edib. Bəs “neradzurra” bundan yararlana biləcəkmi, bu sualın cavabına isə bu gün aydınliq gələcək.
“İnter” qitənin ən nüfuzlu klub turnirində qazandığı ardıcıl 4 qələbədən sonra, son turda səfərdə “Atletiko”ya uduzdu – 1:2. Milan klubunun qarşıya qoyduğu vəzifə ilk “səkkizliyə” düşməkdir.
Digər oyunlara gəlincə, evdə “Olimpiakos”la qarşılaşan “Kayrat” xal qazanmağa şanslıdır. “Qarabağ”ın növbəti rəqib “Ayntraxt” “Barselona”nın qonağı olacaq. 1/8 finala birbaşa vəsiqə qazanmağı qarşıya məqsəd qoyan kataloniyalılar hazırda CL-in turnir cədvəlində 18-ci pillədə qərarlaşıb. Hans-Diter Flikin komandası məqsədlərini çatmaq üçün “Ayntraxt”la matçda məhz qələbə qazanmağa çalışacaq. Son 4 oyunda bir xal qazanan “qartallar” isə Avropa futbolunda sensasiya imza atmağa çalışacaq.
“Atalanta” – “Çelsi” görüşündə mərc mütəxəssisləri üstünlüyü London klubuna verməsinə baxmayaraq, fikrimizcə bu cütlərin qarşılaşmasında aşkar favorit yoxdur. Hər iki komandanın hesabında 10 xal var və “təqaüdçilər” yalnız top fərqinə görə italyanları turnir cədvəlində qabaqlayırlar.
19:30 Kayrat – Olimpiakos
21:45 Bavariya – Sportinq CBC Sport
00:00 Atalanta – Çelsi
00:00 Barselona – Ayntraxt
00:00 İnter – Liverpul İctimai TV
00:00 Monako – Qalatasaray CBC Sport, TRT 1
00:00 PSV – Atletiko
00:00 Tottenhem – Slaviya
00:00 Yunion – Marsel