Bu gün 8-ci turla Premyer Liqa bərpa olunur. Şamaxıda Ayxan Abbasovun komandası çempionatın autsayderini qəbul edir.  Milli komandanın sükanı arxasında iki oyuna iki məğlubiyyət almasına baxmayaraq media tərəfindən təriflər qazanan Abbasov hələ ki, “Şamaxı”nı iddialı komandaya çevirməkdə çətinlik çəkir. Amma gəncəlilərin böhranda olduğunu nəzərə alsaq, onun komandası oyunun favoritidir. Azər Bağırovun “Kəpəz”ə qayıdışı müəyyən ümidlər yaradıb. Bu baxımdan oyun maraqla gözlənilir. Oyun ətrafında səslənən “Bağırov Gəncədə möcüzə edə biləcəkmi?” sualıdır.

Günün maraqlı oyunu isə “Azersun Arena”da olacaq. “Qarabağ” öz stadionunda sığınacaq verdiyi Tovuz klubunun nominal qonağı olacaq. Bu oyunda faktiki olaraq liderlik məsələsi həll olunacaq. Hazırda Qurban Berdıyevin komandası lider olsa da, 2 xal geri qalan “qarabağlılar”ın ehtiyatda bir oyunu var.

Premyer Liqa, 8-ci tur.

14.30. “Şamaxı” – “Kəpəz”
Hakim: Əliyar Ağayev

19.00. “Turan Tovuz” – “Qarabağ”
Hakim: Elşən Məsiyev