Fevralın 6-da İtaliyada start götürəcək XXV Qış Olimpiya Oyunlarında ölkəmizi təmsil edəcək nümayəndə heyətinin səfər proqramı və yarış təqvimi dəqiqləşib. Azərbaycanın “Ağ Olimpiada”dakı missiyası artıq son hazırlıq mərhələsinə qədəm qoyub.

Milli Olimpiya Komitəsinin (MOK) mətbuat katibi Murad Fərzəliyevin verdiyi məlumata əsasən, nümayəndə heyəti fevralın 5-də İtaliyaya yola düşəcək. Ölkəmizi bu mötəbər yarışda MOK-un Xarici əlaqələr idarəsinin müdiri Anar Bağırov missiya rəhbəri (şef de-mission) kimi müşayiət edəcək. Qeyd edək ki, Anar Bağırov tanınmış sambo və cüdo mütəxəssisi Natiq Bağırovun oğludur.

Milan və Kortina-d’Ampezzo şəhərlərinin ev sahibliyi edəcəyi XXV Qış Olimpiya Oyunları körlinq yarışları ilə pərdəni açacaq. Oyunların təntənəli açılış mərasimi fevralın 6-da keçiriləcək, yarışlara isə fevralın 22-də yekun vurulacaq.

Ölkəmiz bu il İtaliyada iki idman növü üzrə təmsil olunacaq. Heyətimizin mübarizə proqramı aşağıdakı kimidir:

Vladimir Litvintsev (fiqurlu konkisürmə): Artıq böyük beynəlxalq təcrübəyə malik olan idmançımız fevralın 6-da buz üzərinə çıxacaq.

Anastasiya Papatoma (dağ xizəyi): Dağ enişlərində sürət nümayiş etdirəcək xanım idmançımız isə fevralın 7-də mübarizəyə qoşulacaq.

Bu kiçik, lakin əzmli heyət ölkəmizi qış idman növləri üzrə dünya elitası arasında layiqincə təmsil etmək və yeni uğurlara imza atmaq niyyətindədir.