Premyer Liqasının 26-cı turunda “Qəbələ”yə 0:2 hesabı ilə məğlub olan “Kəpəz”in baş məşqçisi Azər Bağırov matçdan sonra mətbuat konfransında məğlubiyyətin səbəbləri, Yusif İmanovun psixoloji durumu və klubdakı gələcəyi barədə sualları cavablandırıb.
Oyunun gedişatını dəyərləndirən Bağırov, ardıcıl uğurlu nəticələrdən sonra belə bir büdrəmənin qaçılmaz olduğunu qeyd edib: “Düzünü desəm, uğurlu seriyadan sonra nə vaxtsa uduzacağımızı gözləyirdim. Dörd yaxşı turdan sonra səhv edə biləcəyimizi ehtimal edirdim. Bu gün meydanda “Qəbələ”nin qələbəni bizdən daha çox istədiyi hiss olunurdu. İkinci hissədə yol verdiyimiz xırda xətalar qapımızda qolla nəticələndi. Rəqibi təbrik edirəm, çempionat isə davam edir. Artıq qarşıdakı oyunlara baxacağıq”.
Komandanın motivasiya problemi yaşamadığını deyən baş məşqçi, əsas çətinliyin kadr qıtlığı və fürsətlərdən istifadə edə bilməməkdən qaynaqlandığını vurğulayıb: “Heyətində ən az legioner olan komandayıq. Yaradılan epizodları qola çevirə bilməyəndə çətinlik çəkirik. Uğurlu oyunlarımızda məhz bu məqam həlledici olurdu – imkanlardan maksimum yararlanırdıq. Bu gün isə üç əla qol epizodunu boşa verdik. Futbolçularıma həmişə deyirəm: rəqibin kimliyindən asılı olmayaraq, meydanda 100 faiz konsentrasiya lazımdır”.
Milli komandaya çağırılmaması geniş müzakirə olunan qapıçı Yusif İmanovun durumuna toxunan Bağırov, gənc futbolçunun ruhdan düşmədiyini bildirib: “Onunla söhbətimiz olub, psixoloji gərginliyi yoxdur. Məşqçilər korpusu nə vaxt hazır bilsə, o zaman da dəvət göndərəcəklər. Bu gün dəvət almayıbsa, deməli, belə məsləhətdir. Futbolda zövqlər müxtəlifdir, bir oyunçu mənə görə güclü, digərinə görə zəif görünə bilər. Yusif bunu anlayır, daha çox çalışıb öz vaxtını gözləyəcək.”
Milli komandanın məşqçisi Ayxan Abbasovun İmanovla bağlı sərt reaksiyasına da münasibət bildirən Bağırov, həmkarlarının qərarlarına hörmətlə yanaşdığını deyib: “Şəxsən mənim heç bir problemim yoxdur. Ayxan müəllimin futbol fəlsəfəsi, qapıçı seçimi onun öz yanaşmasıdır. Bəzən klubunda oynamayan futbolçunun millidə möhtəşəm çıxış etdiyini görürük. Hər məşqçinin öz baxışı var və mən buna hörmət edirəm”.
Gələcək perspektivləri barədə danışan Azər Bağırov, rəhbərliklə ilkin təmasların olduğunu qeyd edib: “Hələ ki, rəsmi müqavilə imzalanmayıb. Amma müəyyən müzakirələr aparmışıq. Büdcə və maliyyə məsələləri dəqiqləşəndən sonra rəhbərliklə yenidən masaya əyləşəcəyik. Planlarımız var və işimizi bu istiqamətdə davam etdiririk”.