“Nottingem Forest”in hücumçusu Arno Kalimuendo karyerasını bundesliqada davam etdirməyə hazırlaşır. 23 yaşlı fransız forvard “Qarabağ”ın Çempionlar Liqasının əsas mərhələsindəki rəqibi — Almaniyanın “Ayntraxt” klubuna keçir. Bu barədə məşhur insayder Florian Plettenberq məlumat yayıb.
Mənbənin verdiyi məlumata görə, klublar gənc hücumçunun mövsümün sonuna qədər icarəsi barədə tam razılıq əldə ediblər. Müqaviləyə futbolçunun transfer hüquqlarının birdəfəlik satın alınması variantı (opsiya) da daxil edilib. Kalimuendonun cari həftənin sonunadək tibbi müayinədən keçərək rəsmi müqaviləyə imza atacağı gözlənilir.Xatırladaq ki, “Nottingem Forest” Kalimuendonu ötən yay transfer pəncərəsində “Renn” klubundan 30 milyon avroya transfer etmişdi. Böyük ümidlərlə gətirilməsinə baxmayaraq, fransalı hücumçu İngiltərədə əsas heyətə düşməkdə çətinlik çəkib. Cari mövsümdə bütün turnirlərdə cəmi 13 matçda şans qazanan futbolçu (bunlardan yalnız üçündə start heyətdə yer alıb) hesabına cəmi 2 qol yaza bilib.