“Fənərbaxça”nın braziliyalı ulduzu Fred karyerasında yeni səhifə açmağa hazırlaşır. Portuqaliya təmsilçisi “Benfika” təcrübəli yarımmüdafiəçini heyətinə qatmaq üçün rəsmi addımlar atmağa başlayıb.

Komandanın baş məşqçisi Joze Mourinyonun şəxsi istəyi ilə transfer siyahısına daxil edilən Fred üçün “Benfika” rəhbərliyi hərəkətə keçib. Portuqaliyalı mütəxəssis keçmiş şagirdini (“Mançester Yunayted” dönəmində) yenidən öz komandasında görmək üçün danışıqlara başlamaq göstərişini verib.

Domeniko Tedeksonun rəhbərliyi altında qış transfer çalışmalarını sürətləndirən “Fənərbaxça”da bu xəbər sürprizlə qarşılanıb. Komandanın əsas fiqurlarından biri olan braziliyalının gedişi sarı-lacivərdlilərin planlarını dəyişə bilər.

Fredin xidmətində maraqlı olan tək tərəf Portuqaliya klubu deyil. Yunanıstanın “Olimpiakos” komandasının da 31 yaşlı futbolçu üçün mübarizəyə qoşulduğu bildirilir.

“Fənərbaxça” ilə sözləşməsi 2027-ci ilə qədər olan Fred cari mövsümdə 28 rəsmi matçda çıxıb, 1 qol vurub və 3 məhsuldar ötürmə edib.