“Qəbələ” transfer çalışmalarını davam etdirərək heyətinə yeni oyunçu qatıb. “Radarlar” nigeriyalı hücumçu Ismahil Akinade ilə rəsmi müqavilə imzalayıb. 31 yaşlı forvardla bağlanan sözləşmənin müddəti 1,5 ildir.

Təcrübəli oyunçunun son dayanacağı Özbəkistanın “Andican” klubu olub. Karyerası ərzində rəngarəng coğrafiyalarda top qovan Akinade, daha əvvəl İrlandiya, Vyetnam, Malayziya, Misir və Banqladeş klublarında da çıxış edib.

İsmahil Akinade hündürboylu (təxminən 190 sm) və atletik quruluşlu hücumçudur. Bu, “Qəbələ”yə hava toplarında və rəqib cərimə meydançasında daha güclü mübarizə aparmaq imkanı verəcək. O, karyerasının böyük hissəsini İrlandiyada (“Bohemians”, “Bray Uanderers”) keçirib və orada kifayət qədər tanınan hücumçulardan biri olub.

“Andican” heyətində Özbəkistan Kubokunun qazanılmasında pay sahibi olub və hücumda həm “bitirici”, həm də “assist ustadı” kimi tanınır.