“Haberler” portalının məlumatına görə, “Barselona”nın hücumçusu Robert Levandovskinin agenti müştərisinin “Fənərbaxça”ya mümkün transferini müzakirə etmək üçün klubun nümayəndələri ilə görüşüb. Mənbə İstanbul klubunun polşalıdan cavab gözlədiklərini yazıb. Hücumçu karyerasını Türkiyədə davam etdirmək niyyətində olsa, “Fənərbaxça” mövsümün sonuna qədər rəsmi təklif göndərə bilər. 37 yaşlı forvard Polşa ilə Hollandiya arasında keçiriləcək DÇ-2026-nın seçmə oyunu ərəfəsindəki mətbuat konfransında jurnalistlərin gələcəyi ilə bağlı suallarına konkret cavab verməyib. Qeyd edək ki, “Barsa” ilə müqaviləsi yayda bitəcək Levandovski cari mövsümdə klubun heyətində 11 oyunda meydana çıxıb və 7 qol vurub.