Azərbaycana yeni idman yarışları gəlir. Bu gün yeni beynəlxalq tədbirin – “IRONMAN 70.3 BAKU” triatlon yarışının təqdimat mərasimi keçirilib. Təqdim mərasimində Gənclər və İdman Naziri Fərid Qayıbov, Azərbaycan Triatlon Federasiyasının prezidenti Fərid Fərhadzadə, “IRONMAN” Qrupunun EMEA üzrə rəhbərləri — vitse-prezident və baş direktor Tomas Veje Olsen, nümayəndə Alberto Garriga, regional direktor Henrik Brovell və MDB üzrə eksklüziv “IRONMAN” lisenziya sahibi Nurlan Abduov iştirak ediblər.
Yarışa qeydiyyat oktyabrın 23-dən start veriləcək. Yarış özü 2026-cı il sentyabrın 5–6-da Bakıda keçiriləcək. Yarışların proqramına “IRONMAN 70.3” triatlonu, “Fun Run” 5 km qaçışı və “IRONKIDS” uşaq yarışı təşkil olunacaq.
Triatlon yarışının mərhələləri aşağıdakı kimi olacaq:
Üzgüçülük – 1,9 km (Xəzər dənizində tək dövrə)
Velosiped – 90 km (2 dövrə)
Qaçış – 21,1 km yarımmarafon (3 dövrə)
Bundan əlavə, 2026-cı il sentyabrın 4–6-da sakinlər və turistlər üçün geniş əyləncə proqramı, həmçinin “IRONMAN EXPO” zonası təşkil olunacaq. Burada ziyarətçilər rəsmi IRONMAN məhsulları və müxtəlif idman ləvazimatları əldə edə biləcəklər.